2017/11/20

ABANDONATURIKO SOKAK


Bizkaiko Foru Aldundiak (BFA) aurten burutu duen eskaladaren erregulazioaren berrikuspenean, hainbat soka aurkitu dira horma ezberdinetan abandonaturik. Soka hauetariko batzuk aspalditik zeuden bertan, beste batzuk aldiz, azken urteotan finkatu dira.
Abandonaturiko soka baten xehetasuna.

Soka guzti hauek, eskalatzaileek bide berriak ireki edo ekipatzerakoan abandonaturikoak dira, eta ondoren ez ditu inork kendu. Kaltea eragiten diote ingurumenari, bai sortzen duten inpaktu bisualagatik, zaborra direlako, zein harkaitzetako hegaztiei eragiten dieten kalteengatik. BFAk, soka hauetariko batzuk kendu ditu, beste batzuk aldiz, bertan utzi dira leku iristezinetan daudelako eta bertara heltzeak arrisku handia suposatzen duelako.
Anbotoko ekialdeko horman abandonatutako soka baten kokapena.

Eskalada bideak zabaldu eta ekipatzen dituzten eskalatzaileei, sokarik abandonatu ez dezaten eskatu nahi diegu. Lanak amaitzerakoan, mesedez sokak kendu ditzatela lehen baitlehen.
Abandonaturiko sokak ondoko hormetan antzeman dira:

  • Peñalbako arroila Turtziozen (Debekatutako gunea).
  • Basinagreko horma Turtziozen (Debekatutako gunea).
  • Garamendiko horma Igorren (Debekatutako gunea).
  • Untzillatx Mendebaldean Mañarian (Aldi baterako debekatuta).
  • Atxurtuko orratza Atxarten (Aldi baterako debekatuta).
  • Anbotoko ekialdeko horma (Aldi baterako debekatuta).
Abandonatutako soka bat eskalada debekatuta dagoen horma batean.

Abandonatutako soka Atxurtuko orratzan (Atxarte), eskalada aldi baterako erregulatuta dagoena.

Erregulazioak ondoko estekan ikus daitezke:

Eskerrik asko zuen laguntzagatik.

2017/10/20

ARAZOAK HORMA BATZUETAN

Azken aldian hainbat arazo eragin dizkiete eskalatzaileek eta mendizaleek harkaitzetako hegaztiei, eskalada edo sarbidea guztiz edota aldi baterako debekatuta dagoen horma batzuetan. Azken hauetan, eskalatzaileak eta mendizaleak ibili dira errestrikzio garaian eta hainbat hegaztik beraien habiak utzi behar izan dituzte.
Arazoak ondoko hormetan antzeman dira: 
- Basinagre (Turtzioz), Peñalbako arroila (Turtzioz), Garamendi (Igorre), Urrekoatxa (Dima), Mugarra (Mañaria) eta Anbotoko ekialdeko horma (Atxondo).
Arazo hauek saihesteko asmoz, Bizkaiko Foru Aldundiaren Iraunkortasuna eta Ingurune Naturala Zaintzeko Saileko Ingurumen Zuzendaritzak eskalada guztiz debekatuta dagoen hormetan bideak desekipatu ditu eta beste hainbat hormetan soka zaharrak kendu ditu. Era berean, informazio panel berriak kokatu dira hainabt hormetan.
Aurrerantzean araudia errespetatu dezazuen eskatu nahi dizuegu, guztion onurako (eskalatzaileak zein hegaztiak) dela pentsatzen baitugu.
Eskerrik asko.